Сұлтанбеков Тұрсынбек Темірланұлы

Тұрсынбек Темірланұлы Сұлтанбеков 1986 жылы 10 мамырда Жамбыл облысы, Сарысу ауданы, Саудакент ауылында туған. 2004 жылы Байқадам орта мектебін тәмамдаған. Ол мектеп қабырғасының 5 сыныбында оқып жүрген кезінен өлең жазып келеді. Аудандық «Сарысу», облыстық «Балдәурен-балғын шақ», республикалық «Ұлан» газеттерінде тырнақалды туындылары жарық көрді. 2002 жылы жазушы Пернебай Дүйсенбиннің, Байқадам орта мектебінің директоры Лаура Асанованың қамқорлығымен, аудандық мәслихат депутаттарының демеушілігімен Тараз қаласындағы «Сенім» баспасынан «Көктем көңіл» атты алғашқы жыр жинағы оқырманға жол тартты. Ал 2003 жылы Семей жерінде өткен республикалық Абай оқуларында облыстың намысын қорғап, жүлделі екінші орынмен оралды. Сонымен қатар қазақ тілі мен әдебиеті пәнінен аудандық, облыстық олимпиадалардың үш дүркін жеңімпазы. Ұстазы Қаншайым Иманәлиеваның жетекшілігімен «Артығали Ыбыраевтың поэзиясындағы азаматтық сарын» тақырыбында ғылыми жобасын сәтті қорғап, жаңа қырынан танылды. Ал кейіннен облыстық мүшәйраларда топ жарды. Оның өлеңдері «Әулиеата әуендері», «Өрімтал» сынды ұжымдық жинақтарға да енгізілді. 
    Т.Сұлтанбеков Қ.А.Ясауи атындағы Қазақ-Түрік университетін «Филология», Тараз инновациялық гуманитарлық университетін «Құқықтану» мамандықтары бойынша тәмамдаған. Еңбек жолын 2004 жылы Сарысу аудандық «Сарысу» газетінде корректор болып бастаған. Осы басылымда тілші, бөлім меңгерушісі, жауапты хатшы, бас редактордың міндетін атқарушы болып еңбек еткен. 2008 жылы республикалық «Салық тәртібі» газетінде тілші болып жұмыс істеді. Сол жылдың қыркүйек айынан  Жамбыл облыстық «Ақ жол» газетінде меншікті тілші, тілші, «Саясат», «Экономика» бөлімдерінің меңгерушісі болды. Жамбыл облыстық сот актілерін орындау департаментінде, облыстық әділет департаментінде, өңірлік жеке сот орындаушылар алқасында  баспасөз хатшысы, Жамбыл облыстық Халыққа қызмет көрсету орталығында пиар-менеджер болып қызмет атқарған.  2015 жылы  Жамбыл облыстық «ARAI» жастар газетіне бөлім меңгерушісі  болып ауысты.  2017 -2020 жылдары Жамбыл облыстық «ARAI» жастар газеті бас редакторының орынбасары болды. 2020 жылдан "Nur Otan" партиясы Жамбыл облыстық филиалының баспасөз хатшысы.Т.Сұлтанбеков саладағы жемісті еңбегі мен қоғамдық қызметі үшін көптеген марапаттармен наградталған. 2011, 2015, 2016 жылдары Елбасы Н.Назарбаевтың Алғыс хаттарымен, 2015 жылы Елбасы-Қазақстан халқы Ассамблеясының төрағасы Н.Назарбаевтың Құрмет грамотасымен, Жамбыл облысы әкімінің Құрмет грамотасымен (2018), Жамбыл облыстық мәслихатының Құрмет грамотасымен (2013), Тараз қаласы әкімінің Алғыс хатымен (2016), Жамбыл облыстық соты төрағасының Алғыс хатымен  марапатталған. Жамбыл облысы, Тараз қаласы әкімдерінің шығармашыл жастарға арналған сыйақысының иегері. 
2012 жылдан Қазақстан Журналистер одағының мүшесі.
Отбасылы, үш бала тәрбиелеп отыр.